ბექა გორგაძით ტოპ 14-ის კიდევ ერთი კლუბი დაინტერესდა

ფრანგულ პრესაში ბექა გორგაძის შესახებ დღეს ახალი ცნობები გავრცელდა.

არსებული ინფორმაციით, საბოლოოდ გადაწყდა, რომ გორგაძე 30 ივნისს "ბორდოსთან" კონტრაქტის ამოწურვის შემდეგ ჟირონდულ კლუბს დატოვებს. ცნობილი სარაგბო გამოცემა "მიდი-ოლიმპიკი", რომელიც რამდენიმე კვირის წინ გორგაძის სამსახურით "ბაიონის" და "კასტრის" ინტერესის შესახებ წერდა, ამჯერად გვაუწყებს, რომ ბექას დამატებით ტოპ 14-ის კიდევ ერთი კლუბი ინტერესდება - "პო".

"პო" ამჟამად ტოპ 14-ში დარჩენისთვის იბრძვის. კლუბი ამჟამად 36 ქულით მე-13 ადგილზე იმყოფება, რომელიც პლეი-აუტში პრო დ2-ის ფინალში წაგებულ გუნდთან თამაშს ითვალისწინებს. "პო" მის წინ მყოფ "ბაიონს" 3 ქულით ჩამორჩება.  

გორგაძე "ბორდოს" 2018 წელს "მონ-დე-მარსანიდან" შეუერთდა და 25 მატჩში 3 ლელოს გატანა მოახერხა. ბექას ჟირონდულ კლუბთან კონტრაქტი ზაფხულში ეწურება. მას საქართველოს ნაკრების კვართით 31-ჯერ უთამაშია და 2019 და 2020 წლების საუკეთესო ქართველ მორაგბედ დასახელდა. 

ბექამ წლევანდელ ტოპ 14-ში ორი შეხვედრის ჩატარება მოასწრო, ხოლო საქართველოს ნაკრებს შოტლანდიასთან ტესტ-მატჩში და შემოდგომის ერთა თასის სამ შეხვედრაში დაეხმარა. სამწუხაროდ, გორგაძე 29 ნოემბერს ირლანდიასთან მატჩში მძიმედ დაშავდა, ოპერაცია გაიკეთა და წლევანდელ სეზონში ვეღარ ითამაშებს.