რუსეთის ჩემპიონატის ნახევარფინალური წყვილები ცნობილია

რუსეთის ჩემპიონატის მეოთხედფინალური ეტაპის განმეორებით მატჩში "ვვა-პადმასკოვიე" შინ ნოვოკუზნეცკის "მეტალურგს" დაუხვდა და 22:16 აჯობა, თუმცა იქიდან გამომდინარე, რომ პირველ მატჩში, რომელიც შემოდგომაზე გაიმართა 14:26 ჰქონდა წაგებული, ნახევარფინალში "მეტალურგი" გავიდა.

ამ მატჩში "ვვა-პადმასკოვიეს" რიგებში ძირითად შემადგენლობაში იყო ფრთა სანდრო ნახუცრიშვილი, ხოლო "მეტალურგის" სასტარტო თხუთმეტეულში ექვსი ქართველი მორაგბე იყო: პირველხაზელები მიხეილ ფსუტური, მიხეილ რატიაშვილი და მამუკა ხეჩოკოვი, მეორეხაზელი ვლადიმერ გოგოლიძე, რვა ნომერი ნიკოლოზ სუხაშვილი და შუამარბი ნიკოლოზ ბერძული.

ნახევარფინალში "მეტალურგი" პენზას "ლოკომოტივს" შეხვდება, ხოლო მეორე წყვილში ერთმანეთს კრასნოიარსკული გუნდები "კრასნი იარი" და "ენისეი" დაუპირისპირდებიან. პირველი მატჩები 1 და 3 მაისს შედგება.

აქვე შეგახსენებთ, რომ "ლოკომოტივში" ტარიელ დონაძე, გიორგი ჭყოიძე, ილია სპანდერაშვილი, რევაზ ბროძელი და ნიკოლოზ ცირეკიძე ასპარეზობენ, "კრასნი იარში" რობერტ სუთიძე, ნიკო აფციაური და გიორგი ფრუიძე თამაშობენ, "ენისეის" ღირსებას მიხეილ გაჩეჩილაძე და დავით მესხი იცავენ, ხოლო "მეტალურგის" ქართველების შესახებ დასაწყისშივე მოგახსენეთ.