ბათუმმა იუნკერები ბონუსით დაამარცხა - რეგულარული სეზონის გამარჯვებული ბოლო ტურში გამოვლინდება

დიდი 10-ის ზედა ექვსეულის ბოლოსწინა ტურში "ბათუმი" საკუთარ მოედანზე "იუნკერებს" დაუხვდა და ბონუსით 45:3 სძლია.

პირველი ტაიმი 14:3 დასრულდა. მასპინძელთაგან ლელო და სამი ჯარიმა მამუკა ნინიძემ გაიტანა, ხოლო სტუმართაგან ერთი ჯარიმა რამაზ ხარაზიშვილმა შეასრულა ზუსტად.

მეორე ნახევარში კი "ბათუმმა" ძალიან დიდი უპირატესობა მოიპოვა და მეტოქეს ხუთი უპასუხო ლელო დაუდო. აჭარლებმა ერთი საჯარიმო ლელო ჩაიწერეს აქტივში, ხოლო დანარჩენი ლელოები მიხეილ წიკლაურის, ბექა მამრიკიშვილის, საბა შუბითიძის და ნიკა ნინიძის ანგარიშზეა.

"ბათუმმა" 30 ქულა დააგროვა და ლიდერ "აიას" ქულით ჩამორჩება. ბოლო ტურში "ბათუმი" შინ "ლოკომოტივს" ეთამაშება, ხოლო "აია" საკუთარ მოედანზე "იუნკერებს" მიიღებს.