თორნიკე მატარაძე ხუთთვიანი პაუზის შემდეგ მოედანს უბრუნდება

© Icon Sport

ხუთშაბათს პრო დ2-ის 28-ე ტური აიღებს სტარტს: "ანგულემი" "კოლომიეს" დაუხვდება, ხოლო ამ მატჩის დასრულების შემდეგ "პერპინიანი" "ნევერს" უმასპინძლებს.

ოთხიდან სამი გუნდის რიგებში ქართველ მორაგბეებს ვიხილავთ, თუმცა განსაკუთრებით აღსანიშნავი "ნევერის" თადარიგში მარცხენა ბურჯის თორნიკე მატარაძის გამოჩენაა. საქმე იმაშია, რომ 24 წლის მარცხენა ბურჯს 2020 წლის 30 ოქტომბრის შემდეგ ტრავმის გამო აღარ უთამაშია. თორნიკემ მიმდინარე პრო დ2-ში მხოლოდ 4 მატჩის ჩატარება მოახერხა და 2 ლელო გაიტანა. ის "ნევერში" 2018 წელს "ლიონიდან" გადავიდა და მას შემდეგ 34 შეხვედრის გამართვა მოასწრო, საიდანაც 17-ჯერ ძირითად შემადგენლობაში იყო. "პერპინიანის" ძირითად შემადგენლობაშია გამოცდილი მარჯვენა ბურჯი დავით ქუბრიაშვილი, რომელიც მიმდინარე სეზონში მეოცედ ითამაშებს.

"ანგულემის" სასტარტო თხუთმეტეულშია მარცხენა ბურჯი ლუკა გოგინავა, ხოლო ვეტერანი მეორეხაზელი შალვა სუთიაშვილი მარქაფაშია. "კოლომიეს" განაცხადში ბექა შეყლაშვილი ამჯერად არ ფიგურირებს.