ტოპ 14-ის გუნდებს კორონავირუსი დაერია

© Icon Sport

ტოპ 14-ის გუნდებში კორონავირუსი მომრავლდა, რის გამოც გასულ ტურში ოთხი შეხვედრა გადაიდო. 

დღეს ფრანგულ პრესაში გაჟღერდა, რომ ტოპ 14-ის მომდევნო 22-ე ტურშიც კიდევ ოთხი მატჩი გადაიდება. ტური "სტად შაბან-დელმაზე" გასამართი მატჩით უნდა გახსნილიყო, რომელშიც "ბორდოს" "მონპელიესთვის" უნდა ემასპინძლა. "რაგბირამას" ცნობით, "ბორდოში" გასულ კვირას კოვიდ 19-ით ოთხი მორაგბე იყო ინფიცირებული, რომელთაც მიმდინარე კვირაში კიდევ სამი ინფიცირებული დაემატა. ორივე გუნდი ზედიზედ მეორე მატჩს გამოტოვებს. 

მაისისთვის გადაიდება "ბრივი" - "ლა როშელის" დაპირისპირება, რადგან ბრიველთა რიგებში კოვიდის რვა დადებითი შემთხვევა დაფიქსირდა. ბრიველთა მონაწილეობით ასევე ზედიზედ მეორე შეხვედრა გადაიდო.

გავრცელებული ინფორმაციის თანახმად, ასევე გადაიდება "ბაიონი" - "კასტრის" შეხვედრა, რადგან "კასტრის" რიგებში კოვიდის მრავალი შემთხვევა გამოვლინდა. ასევე ზედიზედ მეორე მატჩს გამოტოვებენ "ტულონი" და აუტსაიდერი "აჟენი".