"ეს ჩემთვის ძალიან მნიშვნელოვანი გამოწვევაა" - დავით გურგენაძე პენზას ლოკომოტივში რჩება

© Rugby Club Lokomotiv Penza

დავით გურგენაძემ პენზას "ლოკომოტივთან" ხელშეკრულება ერთი წლით გაახანგრძლივა. ამის შესახებ, რუსული კლუბის ოფიციალური ვებგვერდი წერს.

41 წლის გურგენაძე, რომელსაც წარსულში ესპანეთის ნაკრებში, საკლუბო დონეზე კი ქართულ, ესპანურ, პორტუგალიურ და ფრანგულ კლუბებში უთამაშია, "ლოკომოტივის" შერკინების მწვრთნელი 2019 წლის დეკემბრიდანაა.

"ეს ჩემთვის ძალიან მნიშვნელოვანი გამოწვევაა - ვიმუშაო კიდევ ერთი სეზონი "ლოკომოტივში". დიახ, ჩვენ სერიოზული ამოცანების წინაშე ვდგავართ. მე აქ ძალიან კომფორტულად ვგრძნობ თავს და მინდა გუნდთან ერთად განვვითარდე. დიდი მადლობა "ლოკომოტივს" იმ დროისთვის, რაც ერთად გვიმუშავია და სამომავლო ნდობისთვის", - განაცხადა დავით გურგენაძემ.

შეგახსენებთ, რომ პენზას "ლოკომოტივის" ღირსებას ხუთი ქართველი მორაგბე იცავს: კვაჭი გიორგი ჭყოიძე, მარჯვენა ბურჯი ტარიელ დონაძე, მესამეხაზელი ილია სპანდერაშვილი, ჰავბექი რევაზ ბროძელი და შუამარბი ნიკოლოზ ცირეკიძე. "ლოკომოტივმა" რუსეთის რეგულარული ჩემპიონატი პირველ ადგილზე დაასრულა და ნახევარფინალში "ვვა-პადმასკოვიეს" და "მეტალურგს" შორის გამარჯვებულს შეერკინება.