გიორგი ქართველიშვილი პრო დ2-ის 27-ე ტურის სიმბოლურ გუნდში მოხვდა

ცნობილმა სარაგბო გამოცემა "მიდი ოლიმპიკმა" პრო დ2-ის 27-ე ტურის სიმბოლური გუნდი გამოაქვეყნა.

აღნიშნულ თხუთმეტეულში მოხვდა "ორიაკის" მარჯვენა ბურჯი გიორგი ქართველიშვილი, რომელიც პარასკევს "ანგულემთან" შინ მოგებულ (33:21) მატჩში ძირითად შემადგენლობაში იყო და 63 წუთის განმავლობაში მაღალ დონეზე იასპარეზა. "მიდი ოლიმპიკს" ეს არ გამორჩენია, გიორგის თამაში ორი ვარსკვლავით შეაფასა და სიმბოლურში შეიყვანა. ასევე ორი ვარსკვლავი დაიმსახურა ბექა საღინაძემ, თუმცა თხუთმეტეულში მყოფი ფლანკერები სამი ვარსკვლავით იქნენ შეფასებულნი და სწორედ ისინი მოხვდნენ ტურის საუკეთესო გუნდში.

29 წლის ქართველიშვილმა წლევანდელ პრო დ2-ში 21 შეხვედრა ჩაატარა, საიდანაც 16 შემთხვევაში ძირითად შემადგენლობაში იმყოფებოდა.