დიდ 10-ში 60-წუთიანი მატჩი შედგა - ხარებმა ჯიქს 10 უპასუხო ლელო დაუდო

დიდი 10-ის მეორე ეტაპის ქვედა ექვსეულის მეოთხე ტურში რუსთავი "ხარები" გორის "ჯიქს" დაუხვდა და 64:0 დაამარცხა. 

"ჯიქის" შესახებ კარგად იცით, რომ გუნდი ფაქტობრივად დაშლილია და მაგალითად წინა ტურში, "ლელო სარასენსთან" 15 მორაგბის შეგროვებაც კი ვერ მოახერხა. იმ მატჩში "ჯიქმა" 13 მორაგბით ითამაშა და ორმხრივი შეთანხმების საფუძველზე მატჩი 62-ე წუთზე შეწყდა.

რაც შეეხება დღევანდელ მატჩს, რომლის ტრანსლაცია ჩვენთვის უცნობი მიზეზის გამო არ მოხდა - ამჯერად "ჯიქმა" 15 კაცის შეგროვება შეძლო და 6 მოთამაშე თადარიგშიც ჰყავდა, თუმცა 80-წუთიანი მატჩი ამჯერადაც არ შედგა. გუნდები თავიდანვე შეთანხმდნენ, რომ 30-წუთიან ტაიმებს ითამაშებდნენ და შესაბამისად, შეხვედრამ 60 წუთი გასტანა. 

ამ დროის განმავლობაში "ხარებმა" მეტოქეს 10 უპასუხო ლელო დაუდო. სამი ლელოს გატანა დემეტრე ცაბაძემ მოახერხა, ორ-ორი ლელო ზურაბ ქავთარაძემ და ლევან ნარიმანიძემ დადეს, ხოლო თითო ლელო ლექსო მელიქიშვილმა, ანდრო ღარიბაშვილმა და გიორგი შარვაშიძემ მიითვალეს. შვიდი გარდასახვა გიორგი პეტრიაშვილმა გაიტანა, ხოლო მატჩის საუკეთესო მორაგბედ გიორგი შარვაშიძე დასახელდა.