20 წლის მორაგბის კონტაქტმა იოან უჟე ნოკაუტში ჩააგდო და შესაცვლელი გახდა (VIDEO)

ტოპ 14-ის 21-ე ტურში "კასტრი" საკუთარ მოედანზე "ტულუზს" დაუხვდა და 26:24 დაამარცხა.

შეხვედრის მე-13 წუთზე "კასტრის" 20 წლის მეორეხაზელი ფლორინ  ვანვერბერგი საფრანგეთის ნაკრების გამოცდილი უკანახაზელის იოან უჟეს ჩამოშორებას კონტაქტით ცდილობდა, რა დროსაც უჟემ ძლიერი დარტყმა მიიღო და ნოკაუტში ჩავარდა. ექიმებმა 33 წლის მორაგბეს უმალ დახმარება აღმოუჩინეს და მალევე ფეხზე წამოდგომა შეძლო, თუმცა ეს გაჭირვებით მოახერხა და მოედანი ექიმების დახმარებით დატოვა. სავარაუდოდ, "ტულუზის" მორაგბეს ტვინის შერყევა აქვს.

ცნობისთვის, უჟე საფრანგეთის ნაკრებში 2010-2019 წლებში ასპარეზობდა და 62 მატჩი 14 ლელოს გატანა მოახერხა. ის "ტულუზის" სარაგბო სკოლის აღზრდილია და ძირითად გუნდში დებიუტი 2005 წელს ჰქონდა. მან 2008 წელს "აჟენს" მიაშურა, შემდეგ კი ასევე ორი სეზონი "ბაიონში" გაატარა, რის შემდეგაც 2012 წელს მშობლიურ კლუბს დაუბრუნდა. უჟეს ჯამში "ტულუზის" მაისურით 169-ჯერ უთამაშია და მოწინააღმდეგეთა ლელო 58-ჯერ აიღო.