ტულონს ოლ ბლექსის ვეტერანი მორაგბეები დატოვებენ

ახალი ზელანდიის ნაკრების ვეტერანი შუამარბები, 38 წლის მა'ა ნონუ და 35 წლის ისაია ტოეავა მიმდინარე სეზონის დასრულების შემდეგ "ტულონს" დატოვებენ - აღნიშნულ ინფორმაციას ცნობილი ფრანგული სარაგბო გამოცემა "მიდი-ოლიმპიკი" ავრცელებს.

როგორც ირკვევა, "ტულონის" ხელმძღვანელობას გუნდის გაახალგაზრდავება სურს და ახალი შუამარბების დამატებას გეგმავენ.

ლეგენდარული მა'ა ნონუ "ტულონში" 2015-2018 წლებში თამაშობდა, შემდეგ სამშობლოში დაბრუნდა და "ბლუზში" ჩაირიცხა, მალევე კი ამერიკას მიაშურა, სადაც "სან დიეგოში" ასპარეზობდა, სადაც 4 მატჩის ჩატარება მოუწია, რადგან პანდემიის გამო 2020 წლის აშშ-ის ჩემპიონატი შეწყდა. საბოლოოდ, ნონუ 2020 წელს "ტულონს" სამედიცინო ჯოკრის სტატუსით დაუბრუნდა. მას ხმელთაშუაზღვისპირელთა რიგებში 90-ჯერ უთამაშია და 14 ლელოს გატანა მოახერხა. ნონუს "ოლ ბლექსის" კვართი 2003-2015 წლებში 103-ჯერ აქვს მორგებული და 2011 და 2015 წლების მსოფლიო თასების გამარჯვებულია. 

რაც შეეხება ტოეავას, ის "ტულონს" 2019 წელს "კლერმონიდან" შეუერთდა და 15 მატჩში 2 ლელოს გატანა მოახერხა. მას ახალი ზელანდიის ნაკრებში 2005-2011 წლებში 36-ჯერ უთამაშია და 8 ლელოს გატანა მოახერხა. ტოეავა 2011 წლის მსოფლიო თასის გამარჯვებული გახდა, რის შემდეგაც სამშობლო დატოვა და ჯერ იაპონიისკენ, შემდეგ კი საფრანგეთისკენ აიღო გეზი.