დიდი 10: აიამ ლოკომოტივი არ დაინდო და ლიდერობა დაიბრუნა

© აჩიკო გეგენავა

დიდი 10-ის მეორე ეტაპის ზედა ექვსეულის მეოთხე ტურში "აია" შინ "ლოკომოტივს" დაუხვდა და რამდენიმე ტურის წინ განცდილი მარცხისთვის, სრულფასოვანი რევანში აიღო - 64:5.

გულშემატკივარი ამ მატჩისგან გაცილებით მეტ ბრძოლას და დაძაბულობას მოელოდა, თუმცა მსგავსი არაფერი ყოფილა და ქუთაისელებმა ძალიან იოლად, დიდი სხვაობით იმარჯვეს. "აიამ" მეტოქე ათჯერ დაალელოვა, თავად კი ერთი ლელო მიიღო. დუბლი გაიფორმა გიორგი ბაბუნაშვილმა, ხოლო თითო ლელო გიორგი აბრამიძემ, ლაშა შალიკაშვილმა, სანდრო ფურცხვანიძემ, დავით კლდიაშვილმა, სანდრო მამამთავრიშვილმა, თემურ კოხოძემ, ნოდარ ჭეიშვილმა და ირაკლი სიმსივემ მიითვალეს. "რკინიგზელთაგან" პრესტიჟის ლელო ნიკა წივწივაძემ დადო, ხოლო მატჩის საუკეთესო მორაგბედ სანდრო მამამთავრიშვილი დასახელდა. 

"აიამ" 27 ქულა დააგროვა, "ბათუმს" 2 ქულით გაუსწრო და ლიდერობა დაიბრუნა.