აკადემიას ორთვიანი უქმობის შემდეგ ერთ-ერთი ლიდერი უბრუნდება

ხვალ დიდი 10-ის მეორე ეტაპის მეორე წრე აიღებს სტარტს. თბილისის დროით 14 საათზე მესამე ადგილოსანი "აკადემია" "რაგბი პლატოზე" მის წინ მყოფ "ბათუმს" დაუხვდება და გამარჯვების შემთხვევაში, სატურნირო ცხრილში პოზიციას გადაუცვლის.

"აკადემიის" რიგებში პოზიტიური სიახლეა. "მხატვრებს" ერთ-ერთი ლიდერი დავით მოძღვრიშვილი უბრუნდებათ, რომელმაც ბოლოს 14 თებერვალს გასვლაზე რუსთავის "ხარების" წინააღმდეგ ითამაშა და მატჩის 25-ე წუთზე ტრავმის გამო მოედნის დატოვება მოუწია. 23 წლის მგეზავს, რომელიც ფულბექის პოზიციაზეც ასპარეზობს, მას შემდგომ აღარ უთამაშია და ხუთი მატჩის გამოტოვება მოუწია. მიუხედავად ამისა, მოძღვრიშვილი დიდი 10-ის ერთ-ერთი საუკეთესო მექულეა და 97 გატანილი ქულით დამრტყმელთა სიაში მეექვსე ადგილზე იმყოფება. მოძღვრიშვილი "ბათუმთან" მატჩს მარქაფიდან დაიწყებს.

"აკადემიას" მესამეხაზელი თორნიკე ზოიძე ჰყავს დისკვალიფიცირებული. ასევე არ იქნება მესამეხაზელი გუჯუ ალავიძე და ცხრა ნომერი კოტე იაშვილი.

"ბათუმის" განაცხადში ვერ ვხედავთ: ფრთა დავით ტრაპაიძეს, ფულბექ დურმიშხან ჯაბნიძეს და ცხრა ნომერ კობა ბუჯიაშვილს.