არდი სავეასთვის წლევანდელი სუპერ რაგბი აოტეაროა დასრულებულია

ახალი ზელანდიის ნაკრების მესამეხაზელი არდი სავეა თამაშს დაახლოებით ორი თვე ვერ შეძლებს.

"ჰარიქეინსის" კაპიტანმა კვირას "კრუსეიდერსთან" წაგებულ (27:30) მატჩში მუხლი დაიზიანა. როგორც შემდგომში გაირკვა, ტრავმა სერიოზული გამოდგა და ის თამაშს დაახლოებით 7-8 კვირის განმავლობაში ვერ შეძლებს. ამრიგად, ის წლევანდელ სუპერ რაგბი აოტეაროაში ვეღარ ითამაშებს.

27 წლის არდი სავეა "ჰარიქეინსის" ღირსებას 2013 წლიდან იცავს და სუპერ რაგბიში ჩატარებულ 105 მატჩში 21 ლელოს გატანა მოახერხა, ხოლო "ოლ ბლექსის" კვართით 2016 წლიდან ასპარეზობს და 50 მატჩში 12 ლელო დადო.