ბორდომ რასინგ 92 გაწითლებულ დროში დაამარცხა და ჩემპიონთა თასის ნახევარფინალში გავიდა (VIDEO)

ჩემპიონთა თასის მეოთხედფინალში "ბორდო" "სტად შაბან-დელმაზე" "რასინგ 92"-ს დაუხვდა და მატიო ჟალიბერის მიერ გაწითლებულ დროში გატანილი ჯარიმის წყალობით 24:21 იმარჯვა.

აღსანიშნავია, რომ ამ მატჩში ლელო საერთოდ არ გასულა და გუნდებმა მხოლოდ ჯარიმებით მოიპოვეს ქულები. პირველი ნახევარი ფრედ 9:9 დასრულდა. შეხვედრის დასრულებამდე 10 წუთით ადრე ანგარიში 18:18 იყო. 75-ე წუთზე მატიო ჟალიბერმა "ბორდო" დააწინაურა, მაგრამ 79-ე წუთზე ტედი ირიბარენმა ანგარიში გაათანაბრა და თითქოს მატჩი ფრედ უნდა დასრულებულიყო და დამატებით დროში უნდა გადასულიყო, მაგრამ 82-ე წუთზე მატიო ჟალიბერმა საკუთარი ნახევრიდან გაიტანა ჯარიმა და "ბორდო" ნახევარფინალში გავიდა.  

"ბორდოს" რიგებში მარცხენა ბურჯის პოზიციაზე ლექსო ყაულაშვილი თამაშში 67-ე წუთზე ჩაერთო, ხოლო "რასინგ 92"-ის შემადგენლობაში 43-ე წუთზე შევიდა მარცხენა ბურჯი გურამ გოგიჩაშვილი, რომელმაც 71-ე წუთამდე ითამაშა.