პრო დ2-ში 21 წლის ქართველი ბურჯის დებიუტი შედგა

პრო დ2-ის 24-ე ტურში "ოიონა" საკუთარ მოედანზე "კოლომიეს" დაუხვდა და 25:34 დამარცხდა.

მოედანზე სამი ქართველი მორაგბე ვიხილეთ. მასპინძელთა შორის მარქაფაში იყვნენ ბურჯები ბექა კაკაბაძე და ალექსი სვიანაძე. 25 წლის მარცხენა ბურჯი ბექა კაკაბაძე, რომელიც წინა სეზონიდან "კლერმონში" გვახსოვს, მინდორზე 75-ე წუთზე გამოჩნდა და წლევანდელ პრო 2-ში მეათე შეხვედრა ჩაატარა, ხოლო 72-ე წუთზე მარჯვენა ბურჯის პოზიციაზე თამაშში 21 წლის ალექსი სვიანაძე ჩაერთო, რომელსაც "ოიონას" ძირითად გუნდში და შესაბამისად პრო დ2-ში დებიუტი ჰქონდა. "კოლომიეს" ძირითად შემადგენლობაში იყო გამოცდილი მარჯვენა ბურჯი ბექა შეყლაშვილი, რომელმაც 67 წუთი იასპარეზა.

როგორც ჩვენთვის ცნობილია, ალექსი სვიანაძე რაგბიში ძიუდოდან გადაერთო. მას საქართველოს ჭაბუკთა ძიუდოისტთა ნაკრებში (90+ კგ წონით კატეგორიაში) უასპარეზია და წარმატებებისთვისაც აქვს მიღწეული: 2017 წელს პოლონეთის ქალაქ ბიელსკო ბიალაში და ბერლინში გამართულ ევროპის თასზე ბრინჯაოს მედლები მოიპოვა და სხვა ტურნირებზეც აქვს მედლები მოხვეჭილი. რაც შეეხება რაგბის, ის "ოიონაში" 2020 წელს "ლელო სარასენსიდან" მოხვდა.