გიორგი ჭყოიძე: "როდესაც გულშემატკივარი მხარს გვიჭერს, მათ ძალას ვგრძნობთ და ეს ძალიან გვეხმარება"

© CameraSport

საქართველოს ნაკრებმა "მიხეილ მესხზე" რუმინეთი დაამარცხა 28:17 და 2021 წლის რაგბი ევროპის ჩემპიონატზე მეოთხე გამარჯვება მოიპოვა.

შეხვედრის მეოცე წუთზე "ბორჯღალოსნებს" კვაჭი შალვა მამუკაშვილი გაუძევეს წითელი ბარათით, რის შემდეგაც ოთხ წუთში მინდორზე გიორგი ჭყოიძე გამოჩნდა, რომელმაც მიხეილ გაჩეჩილაძე შეცვალა. 

მატჩის დასრულების შემდეგ, ჭყოიძეს პენზას "ლოკომოტივის" პრესსამსახური დაუკავშირდა, რომელმაც თავის მორაგბესთან აღნიშნულ მატჩთან დაკავშირებით მცირე კომენტარი ჩაწერა. ჭყოიძე გახარებული გახლდათ მაყურებლის დაბრუნებით და აღნიშნა, რომ ქომაგების მხარდაჭერა მათ ძალიან ეხმარებათ. 

"გულშემატკივრების დაბრუნება შესანიშნავი გრძნობა იყო, რადგან როდესაც ჩვენი გულშემატკივარი მხარს გვიჭერს, ჩვენ მათ ძალას ვგრძნობთ და ეს ძალიან გვეხმარება. 

ჩვენ დარწმუნებულები ვიყავით, რომ რუმინეთთან მატჩში გავიმარჯვებით, რადგან ძალიან კარგად მოვემზადეთ, დარწმუნებულები ვიყავით ჩვენს ძალებში და ვიცოდით, რომ რუმინეთის გამკლავებას მოვახერხებდით, რადგან ჩვენი გუნდი უფრო ძლიერია", - განაცხადა ჭყოიძემ.

კითხვაზე, თუ რომელ ნაკრებს შეუძლია 2023 წლის მსოფლიო თასის შესარჩევ ციკლში საქართველოსთვის კონკურენციის გაწევა, მან უპასუხა: "ძალიან რთული თამაში გვქონდა ესპანეთთან. ასევე, პორტუგალია უკეთესად გამოიყურება, ვიდრე შარშან და აქვს კარგი მატჩები."

საქართველოს ნაკრებმა ანთიმოზ ივერიელის თასიც მოიპოვა, რომელიც ამ ორ ქვეყანას შორის თამაშდება. რაგბი ევროპის ჩემპიონატს კი "ბორჯღალოსნები" 18 ქულით დამაჯერებლად ლიდერობენ.