ლეგენდარული მა'ა ნონუ არასპორტული საქციელისთვის წითელი ბარათით დაისაჯა (VIDEO)

შაბათს ტოპ 14-ის მეოცე ტურის მატჩი გაიმართა, რომელშიც "ლიონი" "სტად ჟერლანზე" "ტულონს" დაუხვდა და 54:16 დაამარცხა. 

შეხვედრის 28-ე წუთზე "ლიონის" ცხრა ნომერმა ჟან-მარკ დუსენმა ერთ-ერთ ეპიზოდში მა'ა ნონუს მხარი მიარტყა, რამაც "ოლ ბლექსის" 38 წლის ლეგენდა წყობიდან გამოიყვანა და მასპინძელთა ჰავბექს მთელი ძალით ჩაარტყა სახეში. ვიდეორეფერთან გადამოწმების შემდეგ შეხვედრის მთავარმა მსაჯმა ორივე მორაგბე დასაჯა: დუსენი დაისაჯა პროვოცირებისთვის და ინციდენტის წამოწყებისთვის, თუმცა ვინაიდან მისი დარღვევა არ იყო უხეში, მან ყვითელი ბარათი მიიღო, ხოლო ნონუმ მოწინააღმდეგეს ძლიერად ჩაარტყა სახეში და ის წითელი ბარათით დაისაჯა. სავარაუდოდ, ლეგენდარული შუამარბი დისკვალიფიკაციითაც დაისჯება.