ლოკომოტივმა აია დაამარცხა და ლიდერთან ჩამორჩენა სამ ქულამდე შეამცირა

დიდი 10-ის ზედა ექვსეულის პირველ ტურში "ლოკომოტივი" შევარდენის სარაგბო ბაზაზე ქუთაისის "აიას" ეთამაშა და დაძაბულ ბრძოლაში სძლია.

თბილისელებმა სამ-სამი გარდასახული ლელო და ჯარიმა გაიტანეს, ხოლო ქუთაისელებმა ორ-ორი გარდასახული ლელოს და ჯარიმის გატანა მოახერხეს. "რკინიგზელთაგან" დუბლი გაიფორმა ლაშა გედეხაურმა, ხოლო ერთი ლელო გიორგი ბებიაშვილმა დადო. სტუმართაგან კი ლელოები თორნიკე აქუბარდიამ და ილია გაბისონიამ დადეს.

პირველი ნახევარი 13:10 დასრულდა. მეორე ტაიმშიც ბოლო წუთებამდე გამარჯვებულის ვინაობა გადაუწყვეტელი იყო. ერთი საათის ისე გაილია, რომ ფრე 20:20 იყო, შემდეგ 62-ე წუთზე ბექა წიკლაურმა გაიტანა ჯარიმა და მასპინძლები სამი ქულით გავიდნენ წინ, ხოლო გაწითლებულ დროში ლაშა გედეხაურმა დაალელოვა მეტოქე და ნუგეშის ქულა წაართვა - 30:20. მატჩის საუკეთესო მორაგბედ გიორგი ბებიაშვილი დასახელდა. 

"ლოკომოტივმა" ამ გამარჯვებით 11 ქულა დააგროვა და მეოთხე ადგილზე გადაინაცვლა, რითაც ლიდერ "აკადემიასთან" ჩამორჩენა სამ ქულამდე შეამცირა, ხოლო "აია" 13 ქულით მესამე ადგილზე იმყოფება.