ჯიქმა კვლავ 100-ქულაზე მეტი გაუშვა - დიდ 10-ში მორიგი ასტრონომიული ანგარიში დაფიქსირდა

დიდი 10-ის ქვედა ექვსეულის პირველი მატჩი რუსთავში გაიმართა, სადაც ურთულეს დღეში მყოფი გორის "ჯიქი" რუსთავის "ხარებს" ეთამაშა და მორიგი ასტრონომიული მარცხი განიცადა. ნომინალური მასპინძელი "ჯიქი" იყო, თუმცა მატჩი რუსთავში გაიმართა, რისი მიზეზებიც ჩვენთვის უცნობია. 

"ჯიქს" ძალიან მძიმე დროება უდგას, გუნდი ხელფასების გაცემას ვერ ახერხებდა და ფაქტობრივად დაიშალა, რის გამოც უმეტესად ჭაბუკი მორაგბეებით უწევს თამაში და სათადარიგო მოთამაშეების შეგროვებასაც კი ვერ ახერხებს. ის კი არა, იმის გამო, რომ გორელები 15 მორაგბესაც ვეღარ უყრიან თავს, ზედიზედ მეორე მატჩია ვეტერანი "ბორჯღალოსანი" 43 წლის კახა უჩავა თამაშობს და ამჯერად, საერთოდ შეუცვლელად იასპარეზა.

აქედან გამომდინარე, ის ფაქტი, რომ "ჯიქმა" კვლავ 100 ქულაზე მეტი გაუშვა და დიდი 10-ისთვის მორიგი შეუფერებელი ანგარიში დაფიქსირდა გასაკვირი არაა. რუსთაველებმა მოწინააღმდეგეს 17 (!) უპასუხო ლელო გაუტანეს, საიდანაც ოთხი ლელოს დადება კვაჭმა დიმიტრი ცაბაძემ მოახერხა, რომელიც მატჩის საუკეთესო მორაგბედ დასახელდა. 

"ხარებმა" პირველ ნახევარში შვიდი უპასუხო ლელო დაუდო მეტოქეს და ტაიმი 0:50 მორჩა, ხოლო მეორე ტაიმში კიდევ ათი ლელო გავიდა და საბოლოო ჯამში მატჩი 0:116 დასრულდა.