"მსაჯობა გინდა"? - ნიკა ამაშუკელის ესპანელი მორაგბისადმი შეკითხვამ კომენტატორები გაამხიარულა (VIDEO)

რაგბი ევროპის ჩემპიონატის მესამე რაუნდში რუმინეთის ნაკრები ბუქარესტში ესპანეთი მიიღო და მძიმე ბრძოლაში 22:16 დაამარცხა.

შაბათს გამართულ დაპირისპირებას ქართველი მსაჯები მოემსახურნენ: ნიკა ამაშუკელი მთავარი არბიტრი გახლდათ, რომელსაც კიდეებიდან გიგა მშვენიერაძე და პაპუნა ჭიქაბერიძე ეხმარებოდნენ, ხოლო ვიდეორეფერი სულხან ჩიხლაძე იყო. მატჩი ძალიან რთული სამსაჯო გახლდათ, რადგან გუნდები (განსაკუთრებით ესპანეთი) უდისციპლინობით გამოირჩეოდნენ და შესაბამისად, ნიკა ამაშუკელს 4 ყვითელი და 1 წითელი ბარათის ჩვენება მოუწიათ, საიდანაც მხოლოდ 1 ყვითელი ბარათი იყო განკუთვნილი რუმინეთისადმი. გარდა ამისა, ესპანელები ხშირად კამათობდნენ და ერთ მომენტში ამაშუკელმა ამისთვის მათი კვაჭი მარკო პინტო დააჯარიმა კიდეც.

შეხვედრის მე-18 წუთზე კი, როდესაც ნიკა ამაშუკელმა რუმინეთის მხრიდან წინ თამაში შესაბამისი ჟესტიკულაციით დააფიქსირა, ესპანელმა მეორეხაზელმა ლუკას გიომმა დაახლოებით მსგავსი ჟესტიკულაცია გაიმეორა და რაღაც ჩაილაპარაკა, რაზეც ამაშუკელმა მას ჰკითხა, "მსაჯობა გინდა" (Do you want to Ref)? ესპანელ მორაგბეს ჩაეღიმა და მაშინვე თავი გააქნია, ხოლო მატჩის კომენტატორები ამაშუკელის ხუმრობამ ძალიან გაახალისა და ვისაც ეს ეპიზოდი არ გამორჩა, ალბათ ბევრს ლეგენდარული არბიტრის ნაიჯელ ოუენსის მსგავის სტილის ხუმრობები გაახსენდებოდა. შემდეგ კი მატჩის კომენტატორებმა ახალგაზრდა ქართველი მსაჯი შეაქეს.