მერაბ შარიქაძე: "ვთვლი, რომ მატჩიდან მატჩამდე ვვითარდებით"

რაგბი ევროპის ჩემპიონატის მესამე რაუნდში საქართველოს ნაკრებმა კალინინგრადში რუსეთი უშანსოდ 23:6 დაამარცხა და ბონუსიც აიღო.

მატჩის დასრულების შემდეგ კომენტარი გააკეთა საქართველოს ნაკრების კაპიტანმა მერაბ შარიქაძემ, რომელიც ფიქრობს, რომ გუნდი მატჩიდან მატჩამდე ვითარდება.

"ვფიქრობ, კარგი შეხვედრა ჩავატარეთ და კარგი ლელოებიც გავიტანეთ. თავისთავად იყო შეცდომებიც, რასაც ვერ გავექცევით, თუმცა ვთვლი, რომ მატჩიდან მატჩამდე ვვითარდებით. მიუხედავად იმისა, რომ რაღაც ასპექტები ჯერ კიდევ გამოსასწორებელი გვაქვს, სანახაობრივი ლელოები გავიტანეთ და შემდეგ თამაშზე კიდევ უფრო თავდაჯერებული ვიქნებით", - ციტირებს შარიქაძის სიტყვებს რაგბის კავშირის ოფიციალური ვებგვერდი.

 საქართველოს ნაკრებმა მიმდინარე რაგბი ევროპის ჩემპიონატზე, რომელიც ამავდროულად 2023 წლის მსოფლიო თასის შესარჩევიცაა, სამივე საგარეო მატჩი მოიგო და ტურნირს დამაჯერებლად 14 ქულით ლიდერობს. როგორც იცით, საფრანგეთში გასამგზავრებელ საგზურს ორი გუნდი პირდაპირ მოიპოვებს, ხოლო მესამე ადგილოსანი რეპეშაჟში გადაინაცვლებს.