არმიასთან უპრინციპულეს მატჩამდე, მამუკა გორგოძემ თავისი გამოცდილება ყაზბეგის მორაგბეებს გაუზიარა

© ხევის სპორტ-ინფო

"ყაზბეგი", რომელიც პირველ ლიგას ლიდერობს და დიდ 10-ში გადასასვლელად იბრძვის, 21 მარტს არსებობის განმავლობაში უმნიშვნელოვანეს შეხვედრას გამართავს და უშუალო კონკურენტს "არმიას" დაუპირისპირდება, რომელსაც ამჟამად 3 ქულით უსწრებს და გამარჯვების შემთხვევაში, უდიდეს ნაბიჯს გადადგამს ელიტაში აღზევებისთვის.

სტეფანწმინდის გუნდი უპრინციპულესი მატჩისთვის "ხვამლი არენაზე" ემზადება. გუშინდელი ვარჯიში, "ყაზბეგისთვის" განსაკუთრებული გამოდგა, რადგან მათ ვარჯიშს არც მეტი და არც ნაკლები, თავად ლეგენდარული მამუკა გორგოძე ეწვია, რომელიც საწვრთნელ პროცესში ჩაერთო და მათთან ერთად ივარჯიშა. "ტულონის" და "მონპელიეს" ყოფილმა მორაგბემ "ყაზბეგის" მოთამაშეებს თავისი გამოცდილება გაუზიარა, რაც თითოეულ მათგანს რასაკვირველია ძალიან წაადგება. გარდა ამისა, მორაგბეებმა და შემდეგ მთელმა გუნდმა, მამუკა გორგოძესთან ერთად არაერთი სამახსოვრო ფოტო გადაიღეს და "არმიასთან" მატჩს პოზიტიურ განწყობაზე ხვდებიან.

გუშინდელ ვარჯიშს "ყაზბეგის" სამწვრთნელო შტაბთან ერთად ასევე უძღვებოდა "ლელო სარასენსის" მწვრთნელი მიხეილ სუჯაშვილი. 

აქვე შეგახსენებთ, რომ "ყაზბეგის" ღირსებას იცავს საქართველოს ნაკრების ლეგენდარული ცენტურიონი მერაბ კვირიკაშვილი და კიდევ ერთი "ბორჯღალოსანი" ირაკლი ყიასაშვილი. ისინი "ყაზბეგს" გასულ ზაფხულს "ლელო სარასენსიდან" შეუერთდნენ.