შალვა სუთიაშვილის საიუბილეო მე-100 მატჩი

© Icon Sport

საქართველოს ნაკრების ლეგენდარულმა მორკინალმა შალვა სუთიაშვილმა ფრანგული "ანგულემის" რიგებში მე-100 შეხვედრა ჩაატარა - წერს შარანტას დეპარტამენტის სარაგბო კლუბის ოფიციალური ვებგვერდი.

"ანგულემმა" პარასკევს "ბეზიე" 15:12 დაამარცხა, ზედიზედ მეორე გამარჯვება მოიპოვა და ბოლო ადგილს დააღწია თავი. სუთიაშვილი მოედანზე 62-ე წუთზე გამოჩნდა და საიუბილეო მე-100 შეხვედრა ჩაატარა. ლუკა გოგინავას, ზაურ თევდორაშვილის და შალვა სუთიაშვილის გუნდი შარშან, სანამ სეზონი ჩაიშლებოდა საპლეიოფო ზონაში იმყოფებოდა, მაგრამ წელს ცუდი სეზონი გამოუვიდა და პრო დ2-ში დარჩენისთვის იბრძვის. ისინი მე-14 ადგილზე მყოფ "მონ-დე-მარსანს" 6 ქულით ჩამორჩებიან. 

"მე-100 მატჩი იასამნისფერი მაისურით ჩვენი საკულტო საერთაშორისო დონის ქართველი მორაგბის შალვა სუთიაშვილისთვის. 

პარასკევს გამართული მატჩის შემდეგ, შალვა შევიდა იმ მოთამაშეთა წრეში, რომლებმაც "ანგულემში" გადალახეს 100-მატჩიანი ნიშნული. გილოცავთ შალვა", - წერს "ანგულემის" ოფიციალური ვებგვერდი.

შალვა სუთიაშვილი "ანგულემს" 2015 წელს შეუერთდა და მოწინააღმდეგეთა ლელო 7-ჯერ აიღო. ის საქართველოს ნაკრებში 2005-2020 წლებში თამაშობდა და 82 მატჩში 2 ლელოს გატანა მოახერხა. მან "ბორჯღალოსნებს" 15-ჯერ უკაპიტნა და ამ მატჩებში საქართველო არასდროს დამარცხებულა. შალვას სამ მსოფლიო თასზე (2011, 2015, 2019) აქვს ნათამაშები.