ფლორინ ვლაიკუს ისტორიული მიღწევა - პირველი 1000-ქულიანი მორაგბე მეორე დონის ქვეყნებიდან

რუმინეთის ნაკრების უკანახაზელი ფლორინ ვლაიკუ მსოფლიო რაგბის ისტორიაში შევიდა. 

საქმე იმაშია, რომ 34 წლის მორაგბემ, რომელსაც თამაში მგეზავის, შუამარბის და ფულბექის პოზიციებზე შეუძლია, რაგბი ევროპის ჩემპიონატის პირველ ტურში, რუსეთთან გასვლაზე წაგებულ (13:18) მატჩში 8 ქულის გატანა მოახერხა, რითაც სანაკრებო კარიერაში 1000 ქულა დააგროვა და საერთაშორისო რაგბის ისტორიაში მეშვიდე მორაგბე გახდა, რომელმაც 1000-ქულიან ნიშნულს მიაღწია. 

მხოლოდ ექვსი მორაგბეა ისეთი, რომელთაც სანაკრებო რაგბიში ვლაიკუზე მეტი ქულა აქვთ გატანილი. ესენი არიან: დიეგო დომინგესი (იტალია | 1991-2003 | არგენტინა 1989 - 1010 ქულა), ოუენ ფარელი (ინგლისი და ბრიტანელი და ირლანდიელი ლომები | 2012-დღემდე - 1031 ქულა), რონან ო'გარა (ირლანდია | 2010-2013 - 1083 ქულა), ნილ ჯენკინსი (უელსი და ბრიტანელი და ირლანდიელი ლომები | 1990-2003 - 1090 ქულა), ჯონი ვილკინსონი (ინგლისი და ბრიტანელი და ირლანდიელი ლომები | 1998-2011 - 1246 ქულა) და დენ კარტერი (ახალი ზელანდია | 2003-2015 - 1598 ქულა).

აღსანიშნავია, რომ ვლაიკუ პირველი მორაგბეა მეორე დონის ქვეყნებიდან, რომელმაც 1000 ქულის გატანა მოახერხა და ამ მხრივაც ისტორიაში შევიდა. გარდა ამისა, ვლაიკუს 125 კეპი აქვს მოხვეჭილი, რაც საერთაშორისო რაგბიში მე-12 მაჩვენებელია, ხოლო მეორე დონის ქვეყნებში, ამ მხრივაც გამორჩეულია და ერთადერთი მორაგბეა, რომელმაც ეროვნული ნაკრების კვართი 125-ჯერ მოირგო.