ირაკლი აბუსერიძე: "ან გვექნება რაგბის კავშირი, ან კიდევ ერთი სამშენებლო კომპანია!"

საქართველოს რაგბის კავშირის გუშინ ჩანიშნული ყრილობა კვლავ ჩაიშალა, რადგან ქვორუმი ისევ არ შედგა - ამის შესახებ გამგეობის თავმჯდომარემ გოჩა მაჭავარიანმა და გამგეობის წევრმა ალექსანდრე გრიგალავამ განაცხადეს.  

გამოცხადდა 24 სუბიექტი, საერთო ხმების რაოდენობა - 42. არჩევნების ჩასატარებლად კი 50 ხმა იყო საჭირო. 

განმეორებითი არჩევნები ათიდან ოცდაათი დღის ვადით უნდა ჩატარდეს. 

ჩაშლილი ყრილობის შემდეგ, სოციალურ ქსელში განცხადება გაავრცელა ირაკლი აბუსერიძემ, რომელიც რაგბის კავშირის პრეზიდენტად 30 დეკემბერს აირჩიეს, თუმცა შემდგომ საჯარო რეესტრმა პრეზიდენტად არ დაარეგისტრირა და ბრძოლის გაგრძელებას სასამართლოში გეგმავს. უცვლელად გთავაზობთ საქართველოს ნაკრების ყოფილი კაპიტნის განცხადებას: "საბედნიეროდ დღეს (უკვე გუშინ), საქართველოს რაგბის კავშირი, კიდევ 10 დღის ვადით დარჩა რაგბის კავშირად და არ იქცა კიდევ ერთ სამშენებლო კომპანიად.

ირაკლი აბუსერიძის მომხრეებმა გუშინდელ არჩევნებს დე ფაქტო უწოდეს და ბოიკოტი გამოუცხადეს, რადგან ისინი ხაზგასმით ამბობენ, რომ 30 დეკემბერს მათ უკვე აირჩიეს ლეგიტიმური პრეზიდენტი ირაკლი აბუსერიძე. ისინი საუბრობენ იმაზე, რომ კლუბებზე დიდი ზეწოლა ხდება, რის გამოც ბევრმა კლუბმა ვერ გაუძლო და არჩევნებზე იოსებ ტყემალაძის სასარგებლოდ გამოცხადდა, რაც მოგვიანებით "წიქარას" წარმომადგენელმა და პრეზიდენტმა დაადასტურეს.