კოვიდაფეთქება საფრანგეთის ნაკრებში: ლე ბლეს ბანაკში კიდევ ორი მორაგბე დაინფიცირდა

რამდენიმე საათის წინ გაუწყეთ, რომ საფრანგეთის ნაკრების ერთ-ერთ ლიდერ ანტუან დუპონს კორონავირუსი დაუდასტურდა. პარასკევს PCR ტესტირება 31 მორაგბეს ჩაუტარდა, საიდანაც 12 მოთამაშის პასუხი გუშინვე იყო ცნობილი: 11 ტესტმა უარყოფითი პასუხი აჩვენა, ხოლო ერთმა, დუპონის ტესტმა - დადებითი. 

დღეს კი დარჩენილი 19 მორაგბის ტესტირების შედეგებიც გამოვლინდა, რომელმაც აჩვენა, რომ საფრანგეთის ნაკრების ბანაკში კიდევ ორი ინფიცირების შემთხვევა გამოვლინდა. კორონავირუსი დაუდასტურდათ ფრთა გაბინ ვილიერს და ბურჯ მოჰამედ აუასს. ამრიგად, "ლე ბლეს" რიგებში კოვიდინფიცირებულთა რიცხვი ექვსამდე გაიზარდა. 

ზემოხსენებული სამი მორაგბის გარდა, დავირუსებულნი არიან მთავარი მწვრთნელი ფაბიენ გალტიე, ასისტენტი უილიამ სერვა და სტაფის კიდევ ერთი წევრი. ყველა მათგანი თვითიზოლაციაში არიან და საფრანგეთის ჯანდაცვის მინისტრის ოლივიე ვერანის ახალი განკარგულების თანახმად, შვიდის ნაცვლად ათი დღე მოუწევთ იზოლაციაში ყოფნა. საფრანგეთის ჯანდაცვის სამინისტრომ ხუთშაბათს მიიღო გადაწყვეტილება, რომ კოვიდინფიცირებულების თვითიზოლაციის ვადა შვიდიდან ათ დღემდე გაზრდილიყო, რათა მოხდეს კორონავირუსის ახალი ე.წ. "ბრიტანული შტამის" შეჩერება.  

სამივე მორაგბე 28 თებერვალს 6 ერის მესამე ტურში შოტლანდიასთან გასამართ საშინაო მატჩს გამოტოვებენ.