გიორგი აფციაური: "მორაგბეებს გვყავს ლეგიტიმურად არჩეული პრეზიდენტი, რომელსაც ბოლომდე დავიცავთ"

იუსტიციის სახლის შემდეგ, მორაგბეების მორიგი აქცია დღეს კანცელარიასთან გაიმართა.

მოთხოვნა უცვლელია: მაღალი თანამდებობის გარკვეულმა პირებმა შეწყვიტონ სარაგბო საქმიანობაში ჩარევა და საშუალება მისცენ 30 დეკემბერს არჩეულ პრეზიდენტს, ირაკლი აბუსერიძეს რაგბის კავშირის მართვა დაიწყოს. აქციაზე შეკრებილნი იყვნენ, როგორც სხვადასხვა კლუბების მორაგბეები, მწვრთნელები და მენეჯერები, ასევე ყველასთვის ცნობილი ვეტერანი "ბორჯღალოსნები". ისინი ერთხმად აცხადებენ, რომ ირაკლი აბუსერიძის არჩევა ლეგიტიმურად მოხდა და 30 დეკემბერს გამართული არჩევნები თავად იმ გამგეობის მიერ გახლდათ ჩანიშნული, რომელმაც შემდგომში არალეგიტიმური უწოდა, რისი მიზეზიც ის გახლდათ, რომ აბუსერიძე ძველი გამგეობისთვის არასასურველი კანდიდატია.

აქციაზე იმყოფებოდა "ბორჯღალოსანი" გიორგი აფციაური, რომელმაც ირაკლი აბუსერიძეს და მის გუნდს სრული მხარდაჭერა გამოუცხადა. 

"ცდილობენ სოსო ტყემალაძის შემოგდებას არჩევნებში, იქ სადაც არჩევნები უკვე არის ჩატარებული და გვყავს ლეგიტიმურად არჩეული პრეზიდენტი ირაკლი აბუსერიძე. ჩვენ საკუთარ არჩევანს არ დავთმობთ, ეს იქნება კობახიძე, ჭიჭინაძე თუ სხვა მთავრობის ჩარეული წევრები, ჩვენ ჩვენი სიმართლე გაგვაჩნია, რისთვისაც ბოლომდე ვიბრძოლებთ. 24 თებერვლის არჩევნები ჩატარდება თუ არა, ეს არაფერს შეცვლის, რადგან ჩვენ, მორაგბეებს გვყავს ლეგიტიმურად არჩეული პრეზიდენტი, რომელსაც დავიცავთ ბოლომდე", - განაცხადა აფციაურმა, რომელსაც საქართველოს ნაკრების კვართი 25-ჯერ აქვს მორგებული და 2015 წლის მსოფლიო თასზე უთამაშია. 

დიდი ხანია არსებობს ჭორები, რომ ირაკლი აბუსერიძის ოპონენტი გუნდის მხრიდან ახალი კანდიდატი იქნებოდა დასახელებული და ეს ადამიანი სოსო ტყემალაძე უნდა ყოფილიყო, რაც როგორც ჩანს სიმართლეს შეესაბამება და დღეს ამაზე მორაგბეები და კლუბების წარმომადგენლები უკვე ღიად საუბრობდნენ. მათ დაადასტურეს, რომ ტყემალაძე სარაგბო კლუბებსაც ხვდება, თუმცა დღეს კანცელარიასთან შეკრებილი მორაგბეებისთვის აღნიშნული კანდიდატურა მიუღებელია, რადგან ისინი თვლიან, რომ მათ უკვე აირჩიეს ლეგიტიმური პრეზიდენტი - ირაკლი აბუსერიძე.