სოჭი და კალინინგრადი - რუსებმა საქართველოსთან და რუმინეთთან მატჩებისთვის სტადიონები დაასახელეს

რუსეთის რაგბის კავშირმა საქართველოსთან და რუმინეთთან მატჩებისთვის, მასპინძელი ქალაქები და სტადიონები დაასახელა.

"დათვების" ოფიციალური ვებგვერდის ცნობით, 6 მარტს რაგბი ევროპის ჩემპიონატის პირველ ტურში რუმინეთის ნაკრებს ქალაქ სოჭის ოლიმპიურ სტადიონზე იგივე "ფიშტი სთედიუმზე" უმასპინძლებენ. ეს სტადიონი 2013 წელს გაიხსნა და 47659 მაყურებელს იტევს. მან 2018 წლის საფეხბურთო მსოფლიო ჩემპიონატის 6 შეხვედრას უმასპინძლა, 2017 წელს კი კონფედერაციის 3 მატჩს. რუსეთის ნაკრებმა "ფიშტზე" 2020 წლის 1 თებერვალს ესპანეთი მიიღო და 12:31 დამარცხდა.

საქართველოსთან მატჩი კი 20 მარტს კალინინგრადში "კალინინგრად სთედიუმზე" ჩატარდება, რომელიც 35212 მაყურებელს იტევს. ამ არენამ 2018 წლის საფეხბურთო მსოფლიო ჩემპიონატის 4 მატჩს უმასპინძლა, ხოლო 2019 წელს რაგბის ევროპის 18-წლამდელთა ჩემპიონატს. რუსეთის ნაკრებმა "კალინინგრად არენაზე" 2020 წლის 22 თებერვალს პორტუგალია მიიღო და 19:18 დაამარცხა.