ბექა გორგაძემ დაადასტურა, რომ მიმდინარე სეზონის ბოლოს ბორდოს დატოვებს

© Baptiste Fernandez

"ბორჯღალოსანმა" ბექა გორგაძემ საქართველოს რაგბის კავშირისთვის მიცემულ ინტერვიუში განაცხადა, რომ პრესაში გავრცელებული ინფორმაცია, რომლის თანახმადაც ის მიმდინარე სეზონის ბოლოს "ბორდოს" დატოვებს, სიმართლეა და ის ახალი კლუბის ძიებაშია. 

გორგაძე ადასტურებს, რომ "ბაიონიდან" რეალური შეთავაზება ჰქონდა, მაგრამ შეთანხმება არ შედგა და ახალ გუნდს თვე-თვენახევარში ელოდება:

"მომავალი სეზონიდან "ბორდოში" აღარ ვიქნები. გავრცელდა ინფორმაცია, რომ კონტრაქტს "ბაიონთან" ვაფორმებდი და შეთანხმებასთან ძალიან ახლოს ვიყავი, მაგრამ საბოლოოდ არ გამოვიდა. არის რაღაც ვარიანტები და ვფიქრობ, მარტის ბოლომდე ყველაფერი გაირკვევა, თუმცა ამ ეტაპზე მთავარი რეაბილიტაციაა და სრულად ამაზე ვარ გადართული", - ციტირებს გორგაძის სიტყვებს რაგბის კავშირის ოფიციალური ვებგვერდი.

25 წლის გორგაძე "ბორდოს" 2018 წელს "მონ-დე-მარსანიდან" შეუერთდა და 25 მატჩში 3 ლელოს გატანა მოახერხა.