ურუგვაის ნაკრები მიმდინარე წელს, სავარაუდოდ, პირველი დონის ორ გუნდს ეთამაშება

ცნობილი სარაგბო გამოცემა Americasrugbynews.Com იუწყება, რომ ურუგვაის ნაკრები 2021 წელს, სავარაუდოდ, პირველი დონის ორ გუნდს შეხვდება.

გავრცელებული ინფორმაციის თანახმად, ურუგვაელები ზაფხულის ტესტებზე უელსის ნაკრებს შეხვდება და ეს იქნება პირველი შემთხვევა, როდესაც ისინი "დრაკონებს" მსოფლიო თასს მიღმა შეხვდებიან. "ლოს ტეროსი" უელსს მონტევიდეოში 26 ივნისს ან 3 ივლისს დაუხვდება, შემდეგ კი უელსელები არგენტინაში გადაინაცვლებენ და "პუმებს" ორმატჩიან სერიაში დაუპირისპირდებიან: 10 და 17 ივლისს. ურუგვაისთვის ეს მატჩი მსოფლიო თასის შესარჩევი ეტაპის გასახურებელი შეხვედრა იქნება: ისინი შესარჩევის პირველ ეტაპზე ბრაზილიას, ჩილეს, კოლუმბიას და პარაგვაის შეერკინებიან.

რაც შეეხება ნოემბრის ტესტებს, როგორც ცნობილია, ურუგვაი შემოდგომაზე ევროპისკენ აიღებს გეზს და სამ შეხვედრას გამართავს: ისინი იტალიას და რუმინეთს ესტუმრებიან, ხოლო ტონგას ნეიტრალურ ადგილას, სავარაუდოდ, ბუქარესტში შეხვდება.