ინგლისი დაქვეითდა, უელსმა წინ წაიწია - მსოფლიო რაგბის რეიტინგი განახლდა

შაბათ-კვირას 6 ერის და რაგბი ევროპის ჩემპიონატის მატჩები გაიმართა. შესაბამისად, ორშაბათს 2021 წლის პირველი ცვლილებები აისახა "მსოფლიო რაგბის" რეიტინგში.

ინგლისი საკუთარ მოედანზე შოტლანდიასთან დამარცხდა, რითაც ორი სარეიტინგო ქულა დაკარგა და მეორედან მესამე პოზიციაზე დაქვეითდა. ედი ჯონსის შეგირდებმა ახალი ზელანდია გაუშვეს წინ. თავის მხრივ, შოტლანდიამ ორი ქულა მოიპოვა. მართალია "ნარშავები" მეშვიდე საფეხურზე დარჩნენ, მაგრამ ავსტრალიას 0.26 ქულითღა ჩამორჩებიან. 

უელსმა შინ ირლანდია დაამარცხა, რომელმაც 65 წუთზე მეტი 14 კაცით ითამაშა. "დრაკონებმა" 1.23 ქულა მოიხვეჭეს, რითაც 80.59 ქულა დააგროვეს და მეცხრედან მერვე ადგილზე გადაინაცვლეს. უელსმა არგენტინას გადაუსწრო. გარდა ამისა, ესპანეთმა შინ პორტუგალია დაამარცხა და 0.19 ქულა შემატა აქტივს და მე-16 ადგილზე მყოფ აშშ-ს მიუახლოვდა, რომელსაც 0.39 ქულით ჩამორჩება. 

საქართველოს ნაკრებმა რუსეთის ძლევით სარეიტინგო ქულები ვერ მოიპოვა, ისევე როგორც საფრანგეთმა იტალიის განადგურებით. 

განახლებული მსოფლიო რეიტინგი.