"აქ თავს ძალიან ბედნიერად ვგრძნობ" - კაკოვინმა სტად ფრანსესთან კონტრაქტი გაახანგრძლივა

გამოცდილმა ქართველმა ბურჯმა ვასილ კაკოვინმა "სტად ფრანსესთან" მოქმედი ხელშეკრულება ერთი წლით გაახანგრძლივა და "სტად ჟან ბუენზე" 2022 წლის ივნისის ბოლომდე ითამაშებს.

ახალ კონტრაქტზე ხელის მოწერის შემდეგ, კაკოვინმა მცირე კომენტარი გააკეთა: "აქ 6 თვის წინ ჩამოვედი და ძალიან ბედნიერი ვარ, რომ აქ ვცხოვრობ. სპორტულად კარგად ვგრძნობ თავს და სრულად ვგრძნობ მწვრთნელთა ნდობას."

31 წლის კაკოვინი "სტად ფრანსეს" მიმდინარე სეზონის დაწყების წინ "რასინგ 92"-დან შეუერთდა და 11 შეხვედრის ჩატარება მოასწრო. სულ კი ტოპ 14-ში 154 შეხვედრა აქვს ჩატარებული. ვასილმა საქართველოს ნაკრების რიგებში 25 კეპი აქვს მოხვეჭილი და 1 ლელოს გატანა მოახერხა. მან 2011 წლის მსოფლიო თასზე ითამაშა, ხოლო უკანასკნელად ბორჯღალიანი კვართი 2016 წელს მოირგო.