იშვიათი შემთხვევა: საქართველო - რუსეთის მატჩზე მსაჯი მეორედ შეიცვალა

რაგბი ევროპის ჩემპიონატის ბოლო ტურის მატჩზე, რომელშიც საქართველოს ნაკრები 7 თებერვალს თბილისში რუსეთს ეთამაშება, მსაჯი მეორედ შეიცვალა. აღნიშნულ ინფორმაციას პორტუგალიური გამოცემა Record.Pt და რუსულენოვანი პორტგალი Rugger.Info ავრცელებენ.

ზემოხსენებული გამოცემების თანახმად, საქართველო - რუსეთის მატჩს პორტუგალიელი მსაჯი პაოლო დუარტე განსჯის. დუარტეს საკმაოდ დიდი ხანია, რაც რაგბი ევროპის ჩემპიონატზე არ უმსაჯია. მან რაგბი ევროპაზე უკანასკნელად 2012 წლის 31 მარტს ბუქარესტში გამართულ მატჩში იმსაჯა, რომელშიც რუმინეთმა უკრაინას უმასპინძლა და 71:0 გაანადგურა. პორტუგალიელი არბიტრი 7-კაცა რაგბიში მაღალ დონეზე მსაჯობს და მსოფლიო სერიების მატჩებს უძღვება. 

როგორც იცით, საქართველო - რუსეთის მატჩი რუმინულ სამსაჯო ბრიგადას უნდა ემსაჯა: მთავარი არბიტრი ალექსანდრუ იონესკუ უნდა ყოფილიყო, ხოლო კიდეებიდან კრისტიან შერბანს და რადუ პეტრესკუს უნდა ემსაჯათ. მსაჯების ჩანაცვლების მიზეზი კი რუმინეთის ხელისუფლების გადაწყვეტილება გახდა, რომელმაც ეპიდემილოგიური ვითარების გაუარესების გამო, არბიტრებს რუმინეთის დატოვება აუკრძალა. 

ასევე შეგახსენებთ, რომ თავდაპირველად საქართველო - რუსეთის დაპირისპირებას ფრანგი მსაჯები უნდა მომსახურებოდნენ: მთავარი არბიტრი 31 წლის პიერ ბრუსე უნდა ყოფილიყო, ხოლო კიდეებიდან სებასტიან მინერი და კრისტოფ ბატსი უნდა დახმარებოდნენ, თუმცა ისინი რუმინელმა მსაჯებმა ჩაანაცვლეს, რისი მიზეზიც უცნობია, მაგრამ სავარაუდოდ ისიც ეპიდემიასთან დაკავშირებულ შეზღუდვებს უკავშირდება, რომელიც საფრანგეთში განსაკუთრებით გამკაცრდა.