რუმინეთი - ბელგიის მატჩი 7 თებერვალს აღარ გაიმართება

"რაგბი ევროპის" ოფიციალური ვებგვერდის ცნობით, 2020 წლის რაგბი ევროპის ჩემპიონატის ბოლო ტურის მატჩი, რომელშიც რუმინეთის ნაკრებს 7 თებერვალს კრაიოვაში ბელგიისთვის უნდა ემასპინძლა, აღარ ჩატარდება. 

ბელგიის რაგბის კავშირმა "რაგბი ევროპას" აცნობა, რომ ბელგიის ხელისუფლება ბელგიის სარაგბო ნაკრებს უფლებას არ აძლევს, რომ იმოგზაუროს რუმინეთში არსებული ეპიდემიოლოგიური ვითარებიდან გამომდინარე, მიუხედავად იმისა, რომ ამჟამად რუმინეთში არ არსებობს შეზღუდვები რაგბი ევროპის ჩემპიონატის თამაშებთან დაკავშირებით. 

"რაგბი ევროპის" დირექტორთა საბჭო მომდევნო რამდენიმე დღის განმავლობაში შეიკრიბება, რათა გადაწყვიტონ, თუ რა ღონისძიება უნდა გატარდეს აღნიშნულ მატჩთან დაკავშირებით და რა გავლენას მოახდენს ტურნირზე. შემდგომი გადაწყვეტილება უახლოეს დღეებში გახდება ცნობილი.