ფიჯელი მორაგბე, რომელმაც მსაჯი ხელში აიყვანა, მკაცრად დასაჯეს (+VIDEO)

© Icon Sport

საფრანგეთის რაგბის ნაციონალური ლიგის სადისციპლინო კომიტეტმა, "ნევერის" ფიჯელი გარემარბი ჯოსაია რაისუკე ხუთკვირიანი დისკვალიფიკაციით დასაჯა. 

26 წლის ფიჯელმა ფრთამ 8 იანვარს "ბეზიესთან" გასვლაზე მოგებული (30:25) მატჩის საფინალო სასტვენისთანავე, სიხარულისგან გამოწვეული ემოციები ვერ შეიკავა და შეხვედრის მთავარი მსაჯი ლორენ მილოტი ხელში აიყვანა და ჰაერში აწია, რის გამოც უმალ წითელი ბარათით დაისაჯა. მოგვიანებით, რაისუკემ ბოდიში მოიხადა, აღნიშნა, რომ ნანობს საკუთარ საქციელს და მსაჯისთვის რაიმეს დაშავება არც უფიქრია. 

საბოლოო ჯამში, სადისციპლინო კომიტეტმა ვერ დაინახა ეპიზოდის "სასაცილო მხარე" და ფიჯელი მორაგბე ხუთკვირიანი დისკვალიფიკაციით დასაჯა, როგორც "მატჩის ოფიციალური პირის მიმართ ქმედების" და "მატჩის ოფიციალური პირის უფლებების უპატივცემულობის გამო". 

აღსანიშნავია, რომ სადისციპლინო კომიტეტის გადაწყვეტილებას სოციალურ ქსელებში ბევრი გულშემატკივარი არ დაეთანხმა, რომლებიც თვლიან, რომ რაისუკეს ქმედებაში საშიში ან აგრესიის მსგავსი რაიმე დეტალი საერთოდ არ ყოფილა და ეს იყო მხოლოდ სიხარულისგან გამოწვეული პოზიტიური ეპიზოდი.