ფრანგებმა დაადასტურეს, რომ 6 ერში მონაწილეობას მიიღებენ და გაფართოებული შემადგენლობა დაასახელეს

ბოლო დღეებში პრესაში გავრცელდა ინფორმაცია, რომ საფრანგეთის ნაკრებს, შესაძლოა, წლევანდელ 6 ერში მონაწილეობა არ მიეღო. ამის მიზეზად ის გამკაცრებული შეზღუდვებია, რომელიც საფრანგეთის მთავრობამ კორონავირუსის ახალი ე.წ. "ბრიტანული შტამის" სწრაფად გავრცელების შესაჩერებლად შემოიღო და საზღვრები ჩაკეტა. როგორც იცით, ამის გამო უკვე გადაიდო ევროპის ჩემპიონთა და ჩელენჯ თასები.

6 ერის შესაძლო გამოტოვებაზე კომენტარი გააკეთა საფრანგეთის რაგბის კავშირის პრეზიდენტმა და "მსოფლიო რაგბის" ვიცე-პრეზიდენტმა ბერნარდ ლაპორტმა, რომელმაც განაცხადა, რომ საფრანგეთის ნაკრები 6 ერზე ჩვეულებრივად ითამაშებს. მისი თქმით, ისინი მკაცრად დაიცავენ ჯანმრთელობის აბსოლუტურად ყველა პროტოკოლს, მათ შორის ახალ ე.წ. "ბრიტანულ შტამზე" მორგებულს. 

ლაპორტის სიტყვები კი სულ მალე საფრანგეთის რაგბის კავშირის ოფიციალურმა ვებგვერდმა გაამყარა, რომელმაც 2021 წლის 6 ერის პირველი ტურის მატჩისთვის, საფრანგეთის ნაკრების გაფართოებული 37-კაციანი შემადგენლობა გამოაქვეყნა. "ლე ბლე" შეკრებას 24 იანვრიდან დაიწყებს, ხოლო პირველ შეხვედრას 6 თებერვალს გასვლაზე იტალიის წინააღმდეგ გამართავს.