ტულუზმა კაკოვინის და მელიქიძის სტად ფრანსე დაამარცხა და ტოპ 14-ში გალიდერდა (VIDEO)

ტოპ 14-ის მეთოთხმეტე ტურის დასკვნით მატჩში "ტულუზმა" საკუთარ კედლებში "სტად ფრანსე" მიიღო და 48:24 აჯობა.

საფრანგეთის მოქმედმა ჩემპიონმა შვიდი ლელოს გატანა მოახერხა, ხოლო საპასუხოდ სამი მიიღო. ტაიმი 22:3 დასრულდა, ხოლო მეორე ნახევარი შედარებით თანაბარი გამოდგა. მასპინძლებს ბონუს ქულაც ერგოთ. დუბლი გაიფორმეს მატის ლებელმა და იოან უჟემ, თითო ლელო ანტუან დუპონმა და ანტუან მიკელმა დადეს, ხოლო ერთ შემთხვევაში მსაჯმა საჯარიმო ლელო ჩათვალა. პარიზელთაგან ლელოები მარკოს კრემერმა, ჯონათან  დანტიმ და რაიან შაპუმ დადეს. 

"სტად ფრანსეს" მარქაფაში იყვნენ ქართველი ბურჯები ვასილ კაკოვინი და გიორგი მელიქიძე. კაკოვინი თამაშში 39-ე წუთიდან ჩაერთო, ხოლო გიორგი მელიქიძე მინდორზე 66-ე წუთზე გამოჩნდა. 

"ტულუზმა" 47 ქულა დააგროვა და ტოპ 14-ს სათავეში ჩაუდგა, თუმცა ამ ტურში "ლა როშელის" მატჩი გადაიდო, რომელსაც 43 ქულა დარჩა და ამ მატჩის მოგების შემთხვევაში, კვლავ გალიდერდება.