პრო დ2: პარასკევს ორ ქართულ დაპირისპირებას და 13 ჩვენებურს ვიხილავთ

პარასკევს პრო დ2-ის მეთხუთმეტე ტურის ხუთი შეხვედრა გაიმართება, რომლებში მონაწილეობასაც 13 ქართველი მორაგბე მიიღებს.

"ბიარიცი" საკუთარ მოედანზე "ვალანს რომანსს" დაუხვდება. ბასკური კლუბის ძირითად შემადგენლობაში არიან ბურჯები უშანგი ჭეიშვილი და გიორგი ნუცუბიძე, მარჯვენა ბურჯის პოზიციაზე თადარიგშია ლუკა აზარიაშვილი, ხოლო ვალანსელთა სასტარტო თხუთმეტეულშია მარჯვენა ბურჯი მირიან ბურდული. 

"რუანი" შინ "ორიაკს" ეთამაშება. ნორმანდიელთა მარქაფაში არიან მარცხენა ბურჯი კახა ასიეშვილი და შუამარბი თამაზ მჭედლიძე. ორიაკელთა ძირითადში იქნებიან კვაჭი ლუკა ნიორაძე და მესამეხაზელი ბექა საღინაძე, ხოლო მეორეხაზელი გიორგი ჯავახია და მარჯვენა ბურჯი ჯემალ შატირიშვილი შეცვლაზე შევლენ. 

"ანგულემი" "სტად შანზიზე" "მონ-დე-მარსანს" მიიღებს. მასპინძელთა ძირითადშია მარცხენა ბურჯი ლუკა გოგინავა, ხოლო მარჯვენა ბურჯი ზაურ თევდორაშვილი მარქაფაშია.

სამივე ზემოხსენებული მატჩი თბილისის დროით 22 საათზე დაიწყება, ხოლო დასკვნითი მატჩი, რომელშიც "ბეზიე" "ნევერს" მიიღებს 23:45 საათზე აიღებს სტარტს. ნევერელთა ძირითადში იქნება მარჯვენა ბურჯი გურამ პაპიძე.