ჩილაჩავას ლელო და აფრასიძის გარდასახვა - ქართველები მონპელიეს ქულის აღებაში დაეხმარნენ (VIDEO)

ტოპ 14-ის მეშვიდე ტურის გამოტოვებულ მატჩში "ლიონი" "სტად ჟერლანზე" "მონპელიეს" დაუხვდა და 24:20 სძლია.

სტუმართა რიგებში ძირითად შემადგენლობაში იყვნენ ბურჯი მიხეილ ნარიაშვილი და ლევან ჩილაჩავა, ხოლო გელა აფრასიძემ თამაში ფრთის პოზიციაზე დაიწყო, თუმცა მატჩის დებიუტში მგეზავმა ტომა დარმონმა ტრავმა მიიღო და ბენუა პაიოგმა ათი ნომრის პოზიციაზე გადაინაცვლა, ხოლო აფრასიძემ - ცხრაზე. ნარიაშვილი პირველი ტაიმის შემდეგ შეცვალეს, ჩილაჩავა მე-60 წუთზე გამოცვალეს, თუმცა მალევე იანიკ აროიო დაშავდა და ქართველი დაბრუნდა, აფრასიძემ კი 80 წუთი ითამაშა.

ჩილაჩავამ, რომელმაც მიმდინარე ტოპ 14-ში პირველად ითამაშა 33-ე წუთზე ლელოს გატანა მოახერხა, რომელიც აფრასიძემ გარდასახა. საბოლოო ჯამში, "მონპელიემ" დაცვითი ბონუს ქულის აღება მოახერხა. აღსანიშნავია, რომ მთავარი მწვრთნელის პოსტზე დებიუტი ჰქონდა ფილიპ სან ანდრეს. "მონპელიე" 18 ქულით მე-13 ადგილზე იმყოფება.