ისტორიული ფაქტი: ჩემპიონთა თასზე ქართველი პირველად იმსაჯებს

16-17 იანვარს 2020/2021 წლების სეზონის ჩემპიონთა თასის მესამე ტურის მატჩები გაიმართება. ამ რაუნდში ქართული რაგბის ისტორიაში ახალი ფურცელი დაიწერება.

საქმე იმაშია, რომ ისტორიაში პირველად, ჩემპიონთა თასზე ქართველი იმსაჯებს. 26 წლის ნიკა ამაშუკელი, რომელიც ჩელენჯ თასს უკვე გაუშინაურდა და ამ ტურნირის თამაშებს მესამე სეზონია უძღვება, ამჯერად ჩემპიონთა თასის მატჩზე მოგვევლინება მთავარ მსაჯად. ის 17 იანვარს "პარიზ ლა დეფენს არენაზე" ფრანგული "რასინგ 92"-ის და ინგლისური "ჰარლექუინსის" დაპირისპირებას განსჯის. 

გარდა ამისა, ამაშუკელი იმსაჯებს ჩელენჯ თასის მეოთხე ტურის შეხვედრას, რომელშიც ფრანგული "ბაიონი" 22 იანვარს იტალიურ "ძებრეს" უმასპინძლებს.