"მომდევნო მატჩისთვის 100%-ით მზად ვარ" - ბექა გიგაშვილი მოედანს უბრუნდება

საქართველოს ნაკრების ბურჯმა ბექა გიგაშვილმა ტრავმა მოიშუშა და შაბათს გასამართი მატჩისთვის, რომელშიც "ტულონი" გასვლაზე "ბორდოს" დაუპირისპირდება, სრულ მზადყოფნაშია. 

ამის შესახებ, "ტულონის" წინასამატჩო პრესკონფერენციაზე 28 წლის ბურჯმა თავად განაცხადა.

"თავს კარგად ვგრძნობ და "ბორდოსთან" გასამართი მატჩისთვის 100%-ით მზად ვარ. ჩვენ შევეცდებით, რომ მაქსიმალურად დავიხარჯოთ და "ბორდოს" დასამარცხებლად ყველაფერი გავაკეთოთ", - თქვა მან.

ბექამ კარგად იცის, რომ მის არყოფნაში ემერიკ სეტიანო კარგად თამაშობდა, რაც მის მოტივაციას კიდევ უფრო აძლიერებს.

"ემერიკ სეტიანო არის ძალიან კარგი მოთამაშე როგორც შერკინებაში, ასევე ღია თამაშში. ის მართლაც ძალიან ძლიერი, კარგი მორაგბეა და ეს რა თქმა უნდა, ჩემს მოტივაციას კიდევ უფრო აძლიერებს", - ამბობს ბექა. 

2021 წლისთვის ბექას "ტულონის" ირგვლივ მხოლოდ ერთი სურვილი აქვს - გახდეს მასთან ერთად საფრანგეთის ჩემპიონი.

"2021 წელს მსურს, რომ გავხდეთ საფრანგეთის ჩემპიონები და დარწმუნებული ვარ, რომ ამისთვის ყველაფერს გავაკეთებთ."

შეგახსენებთ, რომ გიგაშვილმა ტრავმა 5 დეკემბერს საქართველო - ფიჯის მატჩის დასაწყისში მიიღო და მას შემდგომ არ უთამაშია.