გამგეობის დახურული სხდომა დასრულდა - რა გადაწყვეტილება იქნა მიღებული?

დღეს "ლელო სარასენსის" ბაზაზე, რაგბის კავშირის გამგეობის სხდომა პრეზიდენტობის ერთ-ერთი კანდიდატის ბაჩო ხურციძის განცხადების საფუძველზე გაიმართა, რომელშიც ის არჩევნების გადადებას მოითხოვდა.

როგორც დანარჩენი კანდიდატები ირაკლი აბუსერიძე და გოჩა სვანიძე აცხადებდენ, სხდომის ჩანიშვნა ჩუმად მოხდა და გამგეობას არჩევნების გადადება სურდა, რაც მხოლოდ მესამე კანდიდატს ბაჩო ხურციძეს უნდოდა, ხოლო მათთვის არჩევნების გადადება, რომელიც ისედაც თითქმის ერთი წელია გადაიდო, კატეგორიულად მიუღებელია, ისევე როგორც კლუბების და მორაგბეების დიდი ნაწილისთვის.

გამგეობის სხდომა 14 საათზე უნდა გამართულიყო, თუმცა ის დაგვიანებით დაიწყო. თავდაპირველად, არ უშვებდნენ პრეზიდენტობის კანდიდატებს ირაკლი აბუსერიძეს და გოჩა სვანიძეს, ხოლო ბაჩო ხურციძე ადგილზე არ მისულა. "ლელო სარასენსის" ბაზის შესასვლელთან პატრული იყომობილიზებული და გამგეობაზე დასწრების უფლება ჟურნალისტებსაც არ მისცეს, ხოლო აბუსერიძეს და სვანიძეს შესვლის საშუალება რამდენიმე წუთის შემდეგ მიეცათ.

საბოლოო ჯამში, გადაწყვეტილება კვლავ ვერ იქნა მიღებული და ჩაინიშნა კიდევ ერთი სხდომა, რომელშიც საბოლოო გადაწყვეტილება უნდა იყოს მიღებული. გამგეობის მომდევნო სხდომა, რომელშიც საბოლოოდ გაირკვევა ჩატარდება თუ არა 30 დეკემბერს უსაშველოდ გაწელილი საპრეზიდენტო არჩევნები, კვირას 27 დეკემბერს 13 საათზე გაიმართება.