ახალი ზელანდიის ნაკრების ლეგენდა კარიერას ასრულებს

ახალი ზელანდიის ნაკრების ლეგენდარულმა მესამეხაზელმა ჯერომ კაინომ, რომელიც ამჟამად ფრანგულ "ტულუზში" თამაშობს, ოფიციალურად დაადასტურა, რომ მიმდინარე სეზონის შემდეგ ხანგრძლივ სარაგბო კარიერას დაასრულებს.

37 წლის მორაგბემ ამის შესახებ ერთ-ერთი ფრანგული გამოცემისთვის მიცემულ ინტერვიუში განაცხადა. 

"100%-ით შემიძლია ვთქვა, რომ ეს სეზონი ჩემთვის ბოლო იქნება. ყველა მორაგბე რომელიც კარიერას ასრულებს ამის თქმის ჩვეულება აქვს: იცი როდის არის სწორი დრო კარიერის დასასრულებლად. იმის მიუხედავად, რომ რაგბის თამაშით კვლავ სიამოვნებას ვიღებ, ვგრძნობ, რომ ასაკი მემატება და ვერ გავახალგაზრდავდები. მოდიან ახალი მორაგბეები, რომლებიც ამ თაობას შეცვლიან. მე მზად ვარ ბუცების ლურსმანზე ჩამოსაკიდად" - ამბობს კაინო. 

ჯერომ კაინოს "ოლ ბლექსის" შემადგენლობაში 2004-2017 წლებში თამაშობდა, სადაც 83 შეხვედრაში 13 ლელოს დადება მოახერხა. სხვა ტიტულებთან ერთად მან ორჯერ მოახერხა მსოფლიო თასის მოგება. ფრანგულ "ტულუზში" ის 2018 წლიდან ასპარეზობს და 2019 წელს საფრანგეთის ჩემპიონი გახდა.