ჯერ არაოფიციალურად: ლაშა ჯაიანი ინგლისის პრემიერშიპში ითამაშებს

© Sportsfile

ცოტა ხნის წინ ქართულ სოციალურ სივრცეში გავრცელდა ინფორმაცია, რომლის მიხედვითაც საქართველოს ნაკრების მეორეხაზელი ლაშა ჯაიანი კარიერას ინგლისურ "უოსპში" განაგრძობს.

ჩვენთვის არსებული ინფორმაციის თანახმად, აღნიშნული ინფორმაცია სიმართლეს შეესაბამება და ტრანსფერი უახლოეს მომავალში უნდა დადასტურდეს. მხარეებს შორის მოლაპარაკება გასულ კვირას შედგა და როგორც ჩვენ ვიცით, წარმატებით დასრულდა. 

როგორც იცით, გასულ კვირას გიორგი კვესელაძის "გლოსტერში" ტრანსფერი დადასტურდა და თუ ჯაიანის ტრანსფერიც ოფიციალურ სახეს მიიღებს, მაშინ პრემიერშიპში მეოთხე ქართველ მორაგბეს ვიხილავთ. როგორც იცით, იმავე "უოსპსში" ასპარეზობს ზურაბ ჟვანია, ხოლო შალვა მამუკაშვილი "ლესტერ ტაიგერსის" ღირსებას იცავს.

22 წლის ჯაიანმა საქართველოს ნაკრებში 6 კეპი მოხვეჭა მოასწრო. მას დებიუტი 2020 წლის რაგბი ევროპის ჩემპიონატზე ჰქონდა, სადაც ორი შეხვედრა ჩაატარა, ხოლო შემოდგომის ერთა თასზე 4-ჯერ ითამაშა, საიდანაც 3 შემთხვევაში ძირითად შემადგენლობაში გახლდათ. ლაშასთვის ინგლისში ასპარეზობა უცხო არ გახლავთ, ის დიდი ხნის განმავლობაში ექსეტერის უნივერსიტეტში თამაშობდა, ზაფხულში კი სამშობლოში დაბრუნდა და მარნეულის "არმაზს" შეუერთდა, თუმცა სანაკრებო მატჩებიდან გამომდინარე მას დიდ 10-ში არ უთამაშია.