ლა როშელმა ესპანეთის ნაკრების ნიჭიერ მორაგბეს კონტრაქტი გაუხანგრძლივა

"ლა როშელმა" ესპანეთის ნაკრების 21 წლის გარემარბს მარტინ ალონსო მუნიოსს ხელშეკრულება გაუხანგრძლივა.

ახალგაზრდა უკანახაზელი "ლა როშელის" ესპუარებს 2019 წელს "კლერმონიდან" შეუერთდა და გასულ სეზონში ესპუარების ჩემპიონატის გარდა, 7-კაცას პირველობაზეც მიიღო მონაწილეობა, ხოლო წლევანდელ სეზონში ძირითად გუნდშიც გამოჩნდა და 5 მატჩში 1 ლელოს გატანა მოახერხა.

ალონსომ ხელშეკრულება ორი წლით გაახანგრძლივა და "ლა როშელში" 2023 წლამდე დარჩება. აღსანიშნავია, რომ ის 2021 წლის 1 ივლისიდან "ჟიფის" სტატუსს მიიღებს და ლეგიონერად აღარ ჩაითვლება.

მარტინს ესპანეთის ნაკრებში დებიუტი 2020 წლის რაგბი ევროპის ჩემპიონატზე საქართველოსთან შინ წაგებულ (10:23) მატჩში ჰქონდა, მან ითამაშა ბელგიასთან გასვლაზე მოგებულ (30:23) შეხვედრაშიც. გარდა ამისა, ის ესპანეთის 7-კაცა ნაკრებშიც ასპარეზობს და 2017/2018 წლების სეზონიდან მოყოლებული 21 მატჩი ჩაატარა.