ჩემპიონთა თასის გაუქმებული მატჩების შედეგები ცნობილია

როგორც იცით, კორონავირუსის გავრცელების გამო, ბოლო დღეებში ჩემპიონთა თასის მეორე ტურის სამი შეხვედრა გაუქმდა, ერთი კი სულ ცოტახნის წინ გადაიდო. 

უცნობი იყო, თუ რა შედეგებს მიაკუთვნებდნენ ტურნირის ორგანიზატორები გადადებულ მატჩებში მონაწილე გუნდებს. ცოტა ხნის წინ კი ცნობილი გახდა, რომ იმ გუნდებს, რომელთა მიზეზითაც აღნიშნული შეხვედრები ჩაიშალა, 0:28 ბონუს ქულიანი წაგება ჩაეთვალათ. 

შედეგად, მოქმედ ჩემპიონ "ექსეტერ ჩიფსს", ინგლისურ "ბათს" და შოტლანდიურ "გლაზგოს" თავიანთ მეტოქეებთან 0:28 მარცხი ჩაეთვალათ, "ტულუზს", "ლაროშელს" და "ლიონს" კი გათამაშების ცხრილში 5-5 ქულები ჩაეწერათ. რაც შეეხება "სკარლეტსის" და "ტულონის" შეხვედრას მატჩი გაუქმებულად ჯერ არ ითვლება და მისი ჩატარების შანსი ჯერ კიდევ არსებობს, შესაბამისად საბოლოო ვერდიქტი ორგანიზატორებს ჯერ არ გამოუტანიათ. 

არსებული ვითარებით ყველაზე მეტად "ექსეტერ ჩიფსმა" იზარალა, ინგლისური კლუბი ტურნირის მოქმედი ჩემპიონია და "გლაზგოსთან" 42:0 გამარჯვების შემდეგ ფლეიოფში თამაშის კარგ შანსს ინარჩუნებდა, დღევანდელი გადაწყვეტილებით კი მათ საქმე ძალიან გაურთულდათ.