ქართულმა მედიამ შემოდგომის ერთა თასზე საქართველოს ნაკრების საუკეთესო მორაგბე დაასახელა

რამდენიმე დღის წინ, ქართული სარაგბო მედიისგან შემოგთავაზეთ ვრცელი შეფასებები, რომელიც შემოდგომის ერთა თასზე საქართველოს ნაკრების გამოსვლას ეხებოდა.

აღნიშნულ შეფასებებში მონაწილეობა ჯამში 12 ქართველმა რაგბის ჟურნალისტმა და კომენტატორმა მიიღო. თითოეულმა მათგანმა "ბორჯღალოსნების" რიგებიდან ტურნირის საუკეთესო მოთამაშე დაასახელა და ნაკრების თამაში ათბალიანი სისტემით შეაფასა. 

ათბალიანი სისტემიდან "ბორჯღალოსნების" საშუალო შეფასება 6.6 ქულა გამოვიდა. სარაგბო მედიისგან ყველაზე მაღალი შეფასება 8 ქულა გახლდათ, რომელიც ორ შემთხვევაში დაიწერა, ხოლო ყველაზე დაბალი ქულა 5 იყო, რომელიც ასევე ორჯერ დაფიქსირდა. 

რაც შეეხება საუკეთესო "ბორჯღალოსანს" შემოდგომის ერთა თასზე - 12-დან 6 ხმა თორნიკე ჯალაღონიას ერგო და შესაბამისად, ქართული სარაგბო მედიის რჩეული გახდა. სამ-სამი ხმა ერგოთ ბექა გორგაძეს და ბექა საღინაძეს.