ნიკა ამაშუკელის სტატისტიკა ჩელენჯ თასზე - ქართველი დღეს ინგლისურ-ფრანგულ დუელს გაუძღვება

დღეს 2020/2021 წლების ევროთასები აიღებს სტარტს, რომელშიც ტრადიციულად ქართველი მორაგბეები მრავლად ითამაშებენ.

გარდა ამისა, ზედიზედ მესამე სეზონია საქართველოს ნიკა ამაშუკელიც წარმოადგენს. 26 წლის მსაჯი დღეს "ველფორდ როუდზე" იმსაჯებს, სადაც ერთმანეთს შალვა მამუკაშვილის "ლესტერ ტაიგერსი" და ქართველების "ბრივი" დაუპირისპირდებიან. ამ მატჩში ფრანგული კლუბის ძირითად შემადგენლობაში ბადრი ალხაზაშვილი იქნება, ხოლო ირაკლი ცხადაძე და ლუკა ჯაფარიძე შეცვლაზე შევლენ.

აღსანიშნავია, რომ ამაშუკელისთვის "ველფორდ როუდი" ნაცნობი სტადიონია, რადგან მან გასულ სეზონში "ლესტერ ტაიგერსი" -"პოს" მატჩი განსაჯა. სულ ამაშუკელს ჩელენჯ თასის მატჩებზე ექვსჯერ უმსაჯია: 2019/2020 წლების სეზონში 5 მატჩს გაუძღვა, ხოლო 2018/2019 წლების სეზონში "ენისეი" - "ბრისტოლ ბეარსის" დაპირისპირება იმსაჯა. 

ამაშუკელმა ამ 6 მატჩში მორაგბეებს 11 ყვითელი და 2 წითელი ბარათი უჩვენა. მან 7 ყვითელი ბარათი მასპინძელი გუნდის მორაგბეებს აუფრიალა, ხოლო სტუმარი გუნდის მოთამაშეები 4 ყვითელი და 2 წითელი ბარათით დასაჯა. სამ შემთხვევაში მასპინძლები გამოვიდნენ გამარჯვებულები, ხოლო სამჯერ - სტუმრები. 

ნიკას ასისტენტები დღეს ინგლისელი მსაჯები ენდრიუ ჯექსონი და საიმონ მაკქონელი იქნებიან.