ირლანდიასთან მიღებული ტრავმა სერიოზული გამოდგა - ბექა გორგაძე საოპერაციოა

© Sportsfile

საქართველოს ნაკრების რვა ნომრის ბექა გორგაძის ტრავმა სერიოზული გამოდგა. 

გორგაძე კვირას ირლანდიასთან მატჩის 63-ე წუთზე დაშავდა, რის გამოც თამაში რამდენიმე წუთის განმავლობაში შეჩერებული იყო, ხოლო შემდეგ ბექა მოედნიდან სპეციალური მანქანის საშუალებით გაიყვანეს.

ლევან მაისაშვილმა დაადასტურა, რომ გორგაძის ტრავმა სერიოზულია და მას ოპერაციის გაკეთება მოუწევს.

"სამწუხაროდ, დაგვაკლდება ბექა გორგაძე, რომელსაც ჯვარედინი იოგები და მყესი აქვს დაზიანებული. სამწუხაროდ, ის საოპერაციოა, მაგრამ პროფესიონალურ სპორტში ასეთი რამ ხშირია და ვერაფერს ვიზამთ", - განაცხადა "ბორჯღალოსნების" მთავარმა მწვრთნელმა.

მსგავსი ტიპის ტრავმის სარეაბილიტაციო პროცესი დაახლოებით 6-9 თვე მიმდინარეობს, რაც იმას ნიშნავს, რომ ბექა მიმდინარე სეზონში ვეღარ ითამაშებს.