კვესელაძის ზღაპრული კვირა გრძელდება - გიორგის ლელო 8 ერის ტურის საუკეთესო ლელოდ დასახელდა (VIDEO)

შემოდგომის ერთა თასის ოფიციალურმა საიტმა მესამე ტურის საუკეთესო ლელოს გამოსავლენად გამოკითხვა ჩაატარა და ხმათა 92%-ით გამარჯვებული გიორგი კვესელაძის ლელო გახდა. 

გიორგი კვესელაძემ ლელოს დადება ირლანდიასთან 10:23 წაგებულ შეხვედრაში მოახერხა, რისთვისაც ნახევარი მოედანი ირბინა და გზად არაერთი მეტოქე გააბითურა.

მიმდინარე კვირამ შეიძლება ითქვას, რომ ქართველი ცენტრის სრული ბენეფისით ჩაიარა, ის გახდა მესამე ტურის საუკეთესო მორაგბე, მოხვდა ტურის სიმბოლურ გუნდში, ახლა კი საუკეთესო ლელოს ავტორის წოდებაც მოიპოვა. კვესელაძის გარდა გამოკითხვაში, იტალიელი კარლო კანას, ფრანგი გაბრიელ ვილიეს და უელსელი ჯონი უილიამსის ლელოები მონაწილეობდნენ.